অনুশীলনীৰ :

(১) উত্তৰ দিয়া:

(ক) কৃত্ৰিম আঁহ বুলিলে কি বুজা?

উত্তৰ: যিবোৰ আঁহ মানুহে কৃত্ৰিমভাৱে ৰাসায়নিক পদ্ধতিৰে প্ৰস্তুত কৰে, তেনে আঁহবোৰক সাংশ্লেষিক, কৃত্ৰিম অথবা মানৱসৃষ্ট আঁহ বোলে । এইসমূহ সাধাৰণতে পেট্ৰ’লিয়ামৰ কেঁচামাল ব্যৱহাৰ কৰি প্ৰস্তুত কৰা হয় ।

(খ) প্লাষ্টিকৰ ভাগ কেইটা আৰু কি কি?

উত্তৰ: প্লাষ্টিক সাধাৰণতে দুই প্ৰকাৰৰ: ১. থাৰ্ম' প্লাষ্টিক বা তাপ নমনীয় প্লাষ্টিক । ২. থাৰ্ম' ছেটিং প্লাষ্টিক বা তাপদৃঢ় প্লাষ্টিক ।

(গ) কাঠ পচিবৰ বাবে কিমান সময়ৰ প্ৰয়োজন?

উত্তৰ: কাঠ পচিবৰ বাবে প্ৰায় ১০ ৰপৰা ১৫ বছৰ সময়ৰ প্ৰয়োজন ।

(ঘ) 4R নীতি কি?

উত্তৰ: ৪R নীতি হৈছে— হ্ৰাস কৰা (Reduce), পুনৰ ব্যৱহাৰ কৰা (Reuse), পুনৰাৱৰ্তন কৰা (Recycle) আৰু পুনৰুদ্ধাৰ কৰা (Recover) ।

(২) তলত দিয়া সামগ্ৰীসমূহৰ পদাৰ্থবোৰক "পুনৰাবৰ্তন কৰিব পৰা" আৰু "পুনৰাবৰ্তন কৰিব নোৱাৰা" হিচাপে শ্ৰেণীভুক্ত কৰা।

উত্তৰ:

(৩) তলত দিয়াবোৰ কিয় তাপদৃঢ় প্লাষ্টিকেৰে বনোৱা হয় ? ব্যাখ্যা কৰা।

(a) বিদ্যুৎৰ প্লাগ / ছুইচ / প্লাগ ব’ৰ্ড 

উত্তৰ: এইবোৰ বেকেলাইট নামৰ তাপদৃঢ় প্লাষ্টিকেৰে বনোৱা হয় কাৰণ ই তাপ আৰু বিদ্যুতৰ কু-পৰিবাহী । ইয়াৰ মাজেৰে বিদ্যুৎ চালিত হ'লেও ই গলি নাযায়।

(b) ছছপেনৰ নাল 

উত্তৰ: ছছপেনৰ নালবোৰ তাপদৃঢ় প্লাষ্টিকেৰে বনোৱা হয় কাৰণ এই প্লাষ্টিক তাপ পালে গলি নাযায় আৰু অধিক তাপ সহ্য কৰিব পাৰে ।

(c) অগ্নি প্ৰতিৰোধী কাপোৰ

উত্তৰ:  মেলামাইন নামৰ তাপদৃঢ় প্লাষ্টিকে অগ্নি প্ৰতিৰোধ কৰিব পাৰে আৰু অন্য প্লাষ্টিকতকৈ অধিক তাপ সহ্য কৰিব পাৰে । সেয়ে অগ্নি-নিৰ্বাপক বাহিনীৰ কাপোৰত ইয়াৰ প্ৰলেপ দিয়া হয়।

(৪) তাপ নমনীয় আৰু তাপদৃঢ় প্লাষ্টিকৰ মাজত থকা পাৰ্থক্য উল্লেখ কৰা।

উত্তৰ: 

(৫) "পৰাপক্ষত প্লাষ্টিক বৰ্জন কৰা উচিত" — কাৰণ দৰ্শাই ব্যাখ্যা কৰা।

উত্তৰ: প্লাষ্টিক বৰ্জন কৰা উচিত কাৰণ:

• প্লাষ্টিক জৈৱ অপচনশীল পদাৰ্থ, অৰ্থাৎ ই সহজে পচি নাযায় আৰু পৰিৱেশ প্ৰদূষণ ঘটায় ।

  
  

• প্লাষ্টিক দহন কৰিলে বায়ুমণ্ডললৈ বিষাক্ত ধোঁৱা নিৰ্গত হয় যি বায়ু প্ৰদূষিত কৰে ।

  
  

• পেলনীয়া প্লাষ্টিক বা পলিথিন খালে গৰু বা অন্য প্ৰাণীৰ মৃত্যু হ'ব পাৰে ।

  
  

• প্লাষ্টিকৰ বাবে নলা-নৰ্দমাবোৰ বন্ধ হৈ পৰে ।

(৬) কৃত্ৰিম আঁহৰ বৈশিষ্ট্যসমূহ কি কি?

উত্তৰ: কৃত্ৰিম আঁহৰ বৈশিষ্ট্যসমূহ হ’ল:

• এই আঁহবোৰ পাতল, নমনীয় আৰু যথেষ্ট মজবুত ।

  
  

• এইবোৰ সহজে ধুব পাৰি আৰু ধুলে সোনকালে শুকায় ।

  
  

• বহুদিন টিকে আৰু ইয়াৰ দাম প্ৰাকৃতিক আঁহতকৈ কম ।

  
  

• এইবোৰত সহজে ভাঁজ বা শোটোৰা নপৰে ।

  
  

(৭) ৰান্ধনীশালত কাম কৰোঁতে কৃত্ৰিম আঁহৰদ্বাৰা তৈয়াৰী পোছাক কিয় পৰিধান কৰিব নালাগে?

উত্তৰ: কৃত্ৰিম আঁহসমূহ তপ্ত কৰিলে বা তাপ পালে গলি যায় । যদি কাপোৰত জুই লাগে, সেই কাপোৰ গলি গৈ পিন্ধি থকা মানুহজনৰ শৰীৰত লাগি ধৰে, যিটো অতি বিপদজনক । সেইবাবে ৰান্ধনীশালত কাম কৰোঁতে এনে কাপোৰ পিন্ধিব নালাগে ।

(৮) প্লাষ্টিকৰ লগত পৰিৱেশৰ সম্পৰ্ক কি বুজাই লিখা। 

উত্তৰ: প্লাষ্টিক আৰু পৰিৱেশৰ সম্পৰ্ক অতি নেতিবাচক। প্লাষ্টিক এবিধ জৈৱ অপচনশীল পদাৰ্থ হোৱাৰ বাবে ই মাটিত বছৰ বছৰ ধৰি থাকি মাটিৰ উৰ্বৰা শক্তি হ্ৰাস কৰে । জলাশয়ত পেলালে পানী প্ৰদূষিত কৰে আৰু পলিথিনৰ মোনা আদিৰ বাবে নলা-নৰ্দমা বন্ধ হৈ কদৰ্যময় পৰিৱেশৰ সৃষ্টি হয় । আকৌ ইয়াক দহন কৰিলে বিষাক্ত গেছ ওলাই বায়ু প্ৰদূষণ কৰে । গতিকে প্লাষ্টিকে পৰিৱেশৰ ভাৰসাম্য নষ্ট কৰাত বৃহৎ ভূমিকা লয় ।

(৯) শুদ্ধ উত্তৰটো বাছি উলিওৱা।

কৃত্ৰিম আঁহসমূহৰপৰা ৰেয়ন বেলেগ, কিয়নো ?

(ক) প্ৰাকৃতিক আঁহবোৰৰ দৰে ইয়াৰ আঁহবোৰ বব পাৰি।

(খ) ইয়াক কাঠৰ মণ্ডৰপৰা পোৱা যায়।

উত্তৰ: (খ) ইয়াক কাঠৰ মণ্ডৰপৰা পোৱা যায়।

গুৰুত্বপূৰ্ণ ২ নম্বৰীয়া প্ৰশ্ন আৰু উত্তৰ :

১/ কৃত্রিম বা সাংশ্লেষিক আঁহ বুলিলে কি বুজা ? 

উত্তৰ: যিবোৰ আঁহ প্ৰাকৃতিক উৎসৰ পৰা পোৱা নাযায় আৰু মানুহে কৃত্ৰিমভাৱে বিভিন্ন ৰাসায়নিক প্ৰক্ৰিয়াৰে প্ৰস্তুত কৰে, তেনে আঁহবোৰক সাংশ্লেষিক বা মানৱসৃষ্ট আঁহ বোলা হয় ।

২/ ৰেয়নক কিয় 'কৃত্রিম পাট' বুলি কোৱা হয় ? 

উত্তৰ: ঊনৈশ শতিকাৰ শেষৰ ফালে বিজ্ঞানীসকলে পাটৰ দৰে গুণাগুণ থকা এবিধ আঁহ প্রস্তুত কৰাত সফল হৈছিল । যিহেতু এই আঁহ দেখিবলৈ পাটৰ দৰে আৰু পাটতকৈ বহু সস্তা, সেয়ে ইয়াক কৃত্রিম পাট বোলা হয় ।

৩/ নাইলনৰ দুটা বিশেষ গুণ উল্লেখ কৰা।

উত্তৰ: নাইলনৰ দুটা বিশেষ গুণ হ’ল—

• নাইলনৰ আঁহবোৰ নমনীয়, পাতল আৰু যথেষ্ট মজবুত ।

• এইবোৰ উজ্জ্বল হোৱাৰ লগতে ধুবলৈ অতি সহজ ।

৪/ নাইলনৰ সূতাৰে কিয় পেৰাছুট আৰু পৰ্বতাৰোহণৰ ৰছী তৈয়াৰ কৰা হয় ? 

উত্তৰ: নাইলনৰ আঁহবোৰ ইমানেই টান আৰু শক্তিশালী যে এডাল নাইলনৰ সূতা আচলতে তীখাৰ তাঁৰ এডালতকৈও বেছি শক্তিশালী । সেয়েহে সুৰক্ষাৰ বাবে পেৰাছুট আৰু পৰ্বতাৰোহণৰ ৰছীত ইয়াক ব্যৱহাৰ কৰা হয় ।

৫/ পলিকট (Polycot) আৰু পলিউল (Polywool) কিহৰ মিশ্ৰণ ? 

উত্তৰ: পলিকট হ’ল পলিয়েষ্টাৰ আৰু কটন বা কপাহৰ মিশ্ৰণ । আনহাতে, পলিউল হ’ল পলিয়েষ্টাৰ আৰু ঊণৰ এক মিশ্ৰণ ।

৬/ এক্রাইলিক আঁহৰ জনপ্ৰিয়তাৰ কাৰণ কি ? 

উত্তৰ: প্ৰাকৃতিক উৎসৰ পৰা পোৱা ঊণবোৰ বৰ দামী হয় । ইয়াৰ বিপৰীতে এক্ৰাইলিক দেখাত ঊণৰ দৰে হ’লেও ই যথেষ্ট সস্তা, বহু দিন টিকে আৰু বিভিন্ন ৰঙত পোৱা যায় ।

৭/ পেট্র'কেমিকেল বা পেট্ৰ'ৰাসায়নিক কাক বোলে ? 

উত্তৰ: পেট্রলিয়ামৰ পৰা আহৰণ কৰা কেঁচামাল ব্যৱহাৰ কৰি যিবোৰ সাংশ্লেষিক বা কৃত্রিম আঁহ বিভিন্ন প্ৰক্ৰিয়াৰদ্বাৰা প্ৰস্তুত কৰা হয়, সেইবোৰক সাধাৰণতে পেট্র'কেমিকেল বুলি কোৱা হয় ।

৮/ পাকঘৰত কাম কৰোঁতে কৃত্রিম আঁহৰ কাপোৰ পিন্ধাটো কিয় বিপদজনক ? 

উত্তৰ: কৃত্রিম আঁহৰ কাপোৰত জুই লাগিলে ই গলি গৈ পিন্ধি থকা মানুহজনৰ শৰীৰত লাগি ধৰে । সেয়েহে পাকঘৰ বা পৰীক্ষাগাৰত কাম কৰোঁতে এনে কাপোৰ পিন্ধা বিপদজনক ।

৯/ প্লাষ্টিকৰ যিকোনো দুটা বিশেষ ধৰ্ম লিখা।

উত্তৰ: প্লাষ্টিকৰ দুটা ধৰ্ম হ’ল—

• প্লাষ্টিক গলাই যিকোনো আকৃতিৰ সাঁচত ঢালিব পাৰি ।

• প্লাষ্টিকসমূহ তাপ আৰু বিদ্যুতৰ কু-পৰিবাহী ।

১০/ থার্ম প্লাষ্টিক বা তাপ নমনীয় প্লাষ্টিক কাক বোলে ? 

উত্তৰ: যিবোৰ প্লাষ্টিক তাপ পালে সহজে বিকৃত হয় আৰু সহজে ভাঁজ কৰিব পাৰি, তেনে প্লাষ্টিকক থার্ম প্লাষ্টিক বোলে । উদাহৰণস্বৰূপ— পলিথিন আৰু PVC ।

১১/ থার্ম ছেটিং বা তাপদৃঢ় প্লাষ্টিক বুলিলে কি বুজা ? 

উত্তৰ: যিবোৰ প্লাষ্টিকক এবাৰ এক নিৰ্দিষ্ট আকৃতি দিয়াৰ পাছত পুনৰ তপতালেও আৰু আকাৰ দিব নোৱাৰি, সেইবোৰক তাপদৃঢ় প্লাষ্টিক বোলে । উদাহৰণ— বেকেলাইট আৰু মেলামাইন ।

১২/ বেকেলাইট ক'ত আৰু কিয় ব্যৱহাৰ কৰা হয় ? 

উত্তৰ: বেকেলাইট তাপ আৰু বিদ্যুতৰ কু-পৰিবাহী । সেয়েহে ইয়াক বৈদ্যুতিক ছুইচ আৰু বিভিন্ন বাচন-বৰ্তনৰ নাল (Handle) বনাবলৈ ব্যৱহাৰ কৰা হয় ।

১৩/ মেলামাইনৰ দুটা বৈশিষ্ট্য লিখা।

উত্তৰ: মেলামাইনৰ বৈশিষ্ট্যসমূহ হ’ল—

• ই অগ্নি বোধ কৰিব পাৰে ।

• আন প্লাষ্টিকতকৈ ই অধিক তাপ সহ্য কৰিব পাৰে ।

১৪/ লোৰ তুলনাত প্লাষ্টিকৰ পাত্ৰ ব্যৱহাৰ কৰাৰ সুবিধা কি ? 

উত্তৰ: লোৰ দৰে ধাতুত জলীয়বাষ্প আৰু বায়ুৰ সংস্পৰ্শত মামৰে ধৰে, কিন্তু প্লাষ্টিকে পানী বা বায়ুৰ লগত কোনো বিক্ৰিয়া নকৰে । সেয়েহে ই সহজে ক্ষয় নহয় আৰু বহু দিন টিকে ।

১৫/ টেফ্ল'ন (Teflon) কি আৰু ইয়াৰ ব্যৱহাৰ কি ? 

উত্তৰ: টেফ্ল'ন এবিধ বিশেষ প্লাষ্টিক যাৰ ওপৰত তেল আৰু পানী লাগি নধৰে । সেয়েহে ৰান্ধনিশালৰ বাচনত 'আঁট নোখোৱা' প্ৰলেপ (Non-stick coating) দিবলৈ ইয়াক ব্যৱহাৰ কৰা হয় ।

১৬/ জৈৱ পচনশীল পদাৰ্থ কাক বোলে ? 

উত্তৰ: যিবোৰ পদাৰ্থ প্ৰাকৃতিক প্ৰক্ৰিয়াৰে অণুজীৱৰ বিক্ৰিয়াৰ ফলত সহজে পচি মাটিৰ লগত মিহলি হৈ যায়, সেইবোৰক জৈৱ পচনশীল (Bio-degradable) পদাৰ্থ বোলে ।

১৭/ প্লাষ্টিকে কেনেকৈ বায়ু প্ৰদূষণ ঘটায় ? 

উত্তৰ: প্লাষ্টিকৰ দহন প্ৰক্ৰিয়া অতি লেহেম আৰু ই সম্পূৰ্ণৰূপে পুৰি নাযায় । দহনৰ সময়ত প্লাষ্টিকে বায়ুমণ্ডললৈ বহুতো বিষাক্ত ধোঁৱা এৰি দিয়ে, যিয়ে বায়ু প্ৰদূষিত কৰে ।

১৮/ পেলনীয়া প্লাষ্টিকৰ মোনাই গৰু বা অন্য প্ৰাণীৰ কেনেকৈ ক্ষতি কৰে ? 

উত্তৰ: গৰুৱে আৱৰ্জনাৰ সৈতে পলিথিনৰ মোনা গিলিলে ই সিহঁতৰ শ্বাস-প্ৰশ্বাসত বাধা দিয়ে নতুবা পাকস্থলীত এটা তৰপৰ সৃষ্টি কৰে । ই প্ৰাণীবোৰৰ মৃত্যুৰ কাৰণো হ’ব পাৰে ।

১৯/ পৰিৱেশ সুৰক্ষাৰ বাবে '4R' নীতিটো কি ? 

উত্তৰ: '4R' নীতিটো হ’ল— হ্ৰাস কৰা (Reduce), পুনৰ ব্যৱহাৰ কৰা (Reuse), পুনৰাৱৰ্তন কৰা (Recycle) আৰু পুনৰুদ্ধাৰ কৰা (Recover) ।

২০/ প্লাষ্টিকৰ দুটা অসুবিধাজনক গুণ উল্লেখ কৰা।

উত্তৰ: প্লাষ্টিকৰ দুটা অসুবিধা হ’ল—

• প্লাষ্টিক পচিবলৈ বহুত বছৰ লাগে, সেয়ে ই জৈৱ অপচনশীল ।

• ই পৰিৱেশত প্ৰদূষণ ঘটায় আৰু দহন কৰিলে বিষাক্ত ধোঁৱা উৎপন্ন কৰে ।

গুৰুত্বপূৰ্ণ ৫ নম্বৰীয়া প্ৰশ্ন আৰু উত্তৰ :

১/ সাংশ্লেষিক বা কৃত্রিম আঁহৰ ৫ টা প্ৰধান বৈশিষ্ট্য বৰ্ণনা কৰা। 

উত্তৰ: কৃত্রিম আঁহবোৰৰ কেইবাটাও বিশেষত্ব আছে, যাৰ বাবে এইবোৰ বৰ জনপ্ৰিয় । ইয়াৰ ৫ টা বৈশিষ্ট্য হ’ল—

1. স্থায়িত্ব: কৃত্রিম আঁহেৰে তৈয়াৰী পোছাকবোৰ বহুদিনলৈ টিকে ।

2. খৰতকীয়া শুকোৱা: এই আঁহৰ কাপোৰবোৰ ধুলে অতি সোনকালে শুকায় ।

3. সহজ লভ্যতা: এইবোৰ বজাৰত সহজে পোৱা যায় আৰু প্ৰাকৃতিক আঁহতকৈ বেছি সুলভ ।

4. যতন লোৱাত সহজ: কৃত্রিম কাপোৰবোৰ সহজে ৰাখিব পাৰি আৰু ইয়াত ভাঁজ নপৰে ।

5. শোষণ ক্ষমতা: এই আঁহে প্ৰাকৃতিক কাপোৰতকৈ কম পানী শোষণ কৰে ।

২/ ব্যৱহাৰ আৰু গুণাগুণৰ ওপৰত ভিত্তি কৰি নাইলন আৰু ৰেয়নৰ মাজত পাৰ্থক্য লিখা। 

উত্তৰ: নাইলন আৰু ৰেয়নৰ মাজৰ পাৰ্থক্যসমূহ তলত দিয়া হ’ল—

1. উৎস: ৰেয়ন কাঠৰ মণ্ডৰ পৰা ৰাসায়নিক প্ৰক্ৰিয়াৰে প্ৰস্তুত কৰা হয় । আনহাতে, নাইলন কয়লা, পানী আৰু বায়ুৰ পৰা প্ৰস্তুত কৰা হয় ।

2. প্ৰকৃতি: ৰেয়নক সম্পূৰ্ণ সাংশ্লেষিক বুলিব নোৱাৰি কাৰণ ইয়াৰ উৎস প্ৰাকৃতিক । কিন্তু নাইলন হ’ল প্ৰথম সম্পূৰ্ণ সাংশ্লেষিক আঁহ ।

3. শক্তিশালী: নাইলনৰ আঁহ তীখাৰ তাঁৰতকৈও বেছি শক্তিশালী । ৰেয়ন পাটৰ দৰে কোমল আৰু উজ্জ্বল ।

4. ব্যৱহাৰ: ৰেয়নৰ লগত কপাহ মিহলাই বিছনা চাদৰ আৰু উণ মিহলাই কাৰ্পেট বনোৱা হয় । আনহাতে, নাইলনৰ পৰা মোজা, ৰছী, তম্বু আৰু পেৰাছুট তৈয়াৰ কৰা হয় ।

5. খৰচ: ৰেয়ন পাটতকৈ সস্তা আৰু নাইলন ইয়াৰ মজবুত গুণৰ বাবে জনপ্ৰিয় ।

৩/ তাপ নমনীয় (Thermoplastic) আৰু তাপদৃঢ় (Thermosetting) প্লাষ্টিকৰ ৫ টা পাৰ্থক্য লিখা। 

উত্তৰ: এই দুই প্ৰকাৰৰ প্লাষ্টিকৰ পাৰ্থক্যসমূহ হ’ল —

1. তাপৰ প্ৰভাৱ: তাপ পালে তাপ নমনীয় প্লাষ্টিক সহজে বিকৃত হয় । কিন্তু তাপদৃঢ় প্লাষ্টিকক এবাৰ আকৃতি দিয়াৰ পাছত তপতালেও আকাৰ সলাব নোৱাৰি ।

2. ভাঁজ কৰা: তাপ নমনীয় প্লাষ্টিক সহজে ভাঁজ কৰিব পাৰি । তাপদৃঢ় প্লাষ্টিক সহজে ভাঁজ কৰিব নোৱাৰি ।

3. পুনৰাবৰ্তন: তাপ নমনীয় প্লাষ্টিকবোৰ পুনৰাৱৰ্তন কৰিব পাৰি । তাপদৃঢ় প্লাষ্টিক পুনৰাৱৰ্তন কৰা কঠিন ।

4. উদাহৰণ: পলিথিন আৰু PVC হ’ল তাপ নমনীয় প্লাষ্টিক । বেকেলাইট আৰু মেলামাইন হ’ল তাপদৃঢ় প্লাষ্টিক ।

5. ব্যৱহাৰ: ফণি, খেলনা আৰু পাত্ৰ বনাবলৈ তাপ নমনীয় প্লাষ্টিক ব্যৱহাৰ হয় । বৈদ্যুতিক ছুইচ আৰু বাচনৰ নাল বনাবলৈ তাপদৃঢ় প্লাষ্টিক ব্যৱহাৰ হয় ।

৪/ প্লাষ্টিকে কেনেকৈ পৰিৱেশৰ ক্ষতি কৰে আৰু এয়া ৰোধ কৰিবলৈ কি ব্যৱস্থা ল’ব পাৰি ? 

উত্তৰ: প্লাষ্টিক পৰিৱেশৰ বাবে অতি ক্ষতিকাৰক । ইয়াৰ কাৰণ আৰু প্ৰতিকাৰসমূহ হ’ল—

1. প্ৰদূষণ: প্লাষ্টিক পচিবলৈ বহু বছৰ লাগে, সেয়ে ই মাটি প্ৰদূষণ ঘটায় ।

2. দহন: প্লাষ্টিক পুৰিলে বায়ুমণ্ডললৈ বিষাক্ত ধোঁৱা এৰি দি বায়ু প্ৰদূষিত কৰে ।

3. জলনিৰ্গমন: য’তে-ত’তে পেলোৱা পলিথিনে নলা-নৰ্দমা বন্ধ কৰি পেলায় ।

4. প্ৰাণীৰ ক্ষতি: আৱৰ্জনাৰ সৈতে প্লাষ্টিক খালে গৰু বা অন্য প্ৰাণীৰ মৃত্যু হ’ব পাৰে ।

5. সমাধান: দোকানলৈ যাওঁতে মৰাপাট বা কাপোৰৰ মোনা ব্যৱহাৰ কৰা উচিত । লগতে জৈৱ পচনশীল আৰু অপচনশীল আৱৰ্জনাবোৰ পৃথককৈ সংগ্ৰহ কৰিব লাগে ।

৫/ প্লাষ্টিকৰ ৫ টা উল্লেখনীয় বৈশিষ্ট্য আৰু ইয়াৰ দৈনন্দিন ব্যৱহাৰ আলোচনা কৰা। 

উত্তৰ: আমাৰ দৈনন্দিন জীৱনত প্লাষ্টিক এক অপৰিহাৰ্য সামগ্ৰী । ইয়াৰ ৫ টা বৈশিষ্ট্য হ’ল—

1. অ-বিক্ৰিয়াজাত: প্লাষ্টিকে পানী আৰু বায়ুৰ লগত কোনো বিক্ৰিয়া নকৰে, সেয়ে ই সহজে ক্ষয় নহয় ।

2. পাতল আৰু মজবুত: ধাতুৰ তুলনাত পাতল হোৱাৰ বাবে ইয়াক গাড়ী বা আকাশীযানত ব্যৱহাৰ কৰা হয় ।

3. কু-পৰিবাহী: প্লাষ্টিক তাপ আৰু বিদ্যুতৰ কু-পৰিবাহী, সেয়ে বৈদ্যুতিক তাঁৰৰ ওপৰত ইয়াৰ আৱৰণ থাকে ।

4. স্বাস্থ্য সেৱা: টেবলেটৰ পেকেট, চিৰিঞ্জ আৰু চিকিৎসকৰ হাতমোজা প্লাষ্টিকেৰে তৈয়াৰী ।

5. বিশেষ প্ৰলেপ: টেফ্ল’ন নামৰ প্লাষ্টিকত তেল আৰু পানী লাগি নধৰে, সেয়ে ইয়াক ৰন্ধন সৰঞ্জামৰ 'নন-ষ্টিক' প্ৰলেপ হিচাপে ব্যৱহাৰ কৰা হয় ।

*************