অধ্যায় : ৩
অসমত ব্রিটিছ বিৰোধী জাগৰণ আৰু কৃষক বিদ্রোহ
MAIN CONTENT
অতি চমু উত্তৰৰ প্ৰশ্ন :
১। ব্ৰিটিছ শাসন প্ৰতিষ্ঠা হোৱাৰ পিছত অসমৰ ৰাজহ সংগ্ৰহৰ পদ্ধতিৰ কি পৰিৱৰ্তন হৈছিল?
উত্তৰ: ব্ৰিটিছ শাসনৰ পূৰ্বতে অসমত মুদ্রাৰে ৰাজহ সংগ্ৰহৰ ব্যৱস্থা নাছিল। কিন্তু ইংৰাজে প্ৰৱৰ্তন কৰা নতুন ৰাজহ ব্যৱস্থাত টকাৰ মাধ্যমত মাটিৰ খাজনা আৰু অন্যান্য কৰ-কাটল সংগ্ৰহ কৰিবলৈ আৰম্ভ কৰা হয় ।
২। কোন চনত মফট মিলচ অসমলৈ আহিছিল?
উত্তৰ: ১৮৫৩ চনত মফট মিলচ অসমৰ প্রশাসন ব্যৱস্থাৰ বিষয়ে অনুসন্ধান কৰিবলৈ আহিছিল ।
৩। কেঞাসকল কোন আছিল?
উত্তৰ: কেঞাসকল আছিল অসমৰ বাহিৰৰ বিশেষকৈ পশ্চিম ভাৰতৰপৰা অহা মাৰোৱাৰী সম্প্ৰদায়ৰ সুদখোৰ মহাজন আৰু বেপাৰী ।
৪। অসমত ১৮৫৭ চনৰ বিদ্ৰোহৰ নেতৃত্ব কোনে দিছিল?
উত্তৰ: অসমত ১৮৫৭ চনৰ বিদ্ৰোহৰ নেতৃত্ব মণিৰাম দেৱানে দিছিল ।
৫। ১৮৫৭ চনৰ বিদ্ৰোহত অসমৰ বিদ্ৰোহীসকলে কোন আহোম ৰাজকোঁৱৰক পুনৰাই আহোম সিংহাসনত বহুৱাব খুজিছিল?
উত্তৰ: ১৮৫৭ চনৰ বিদ্ৰোহত বিদ্ৰোহীসকলে আহোম ৰাজকোঁৱৰ কন্দপেশ্বৰ সিংহক পুনৰাই আহোম সিংহাসনত বহুৱাব খুজিছিল ।
৬। মণিৰাম দেৱানক কোন বাঙালী মুক্তিয়াৰে সহায় কৰিছিল?
উত্তৰ: মণিৰাম দেৱানক মধুমল্লিক নামৰ এজন বাঙালী মুক্তিয়াৰে সহায় কৰিছিল ।
৭। মণিৰাম দেৱানৰ লগত আৰু কোন ফাঁচিকাঠত ওলমিব লগা হৈছিল?
উত্তৰ: মণিৰাম দেৱানৰ লগত পিয়লি বৰুৱা ফাঁচিকাঠত ওলমিব লগা হৈছিল ।
৮। কোনে মণিৰাম দেৱানৰ বিচাৰ কৰিছিল?
উত্তৰ: কেপ্টেইন হলৰইডে বিশেষভাবে গঠিত বিচাৰপীঠৰ দ্বাৰা মণিৰাম দেৱানৰ বিচাৰ কৰিছিল ।
৯। অসমৰ ১৮৫৭ চনৰ বিদ্ৰোহৰ বিফলতাৰ দুটা কাৰণ উল্লেখ কৰা।
উত্তৰ: দুটা কাৰণ হ’ল— (ক) বিদ্ৰোহীসকলৰ সংখ্যা অতি তাকৰীয়া আছিল আৰু (খ) বিদ্ৰোহৰ মুখ্য সংগঠক মণিৰাম দেৱান বিদ্ৰোহস্থলীৰপৰা বহু দূৰৈত অৰ্থাৎ কলিকতাত আছিল ।
১০। কোন কোন চনত টিকট কৰ আৰু আয়কৰ প্ৰৱৰ্তন কৰা হৈছিল?
উত্তৰ: ১৮৫৮ চনত টিকট কৰ আৰু ১৮৬০ চনত আয়কৰ প্ৰৱৰ্তন কৰা হৈছিল ।
১১। ব্ৰিটিছৰ দিনত অসমৰ কৃষকৰ দুৰৱস্থাৰ দুটা কাৰণ লিখা।
উত্তৰ: দুটা কাৰণ হ’ল— (ক) অত্যাধিক হাৰত বৃদ্ধি কৰা মাটিৰ খাজনা আৰু (খ) চৰকাৰে কৃষি উন্নয়নৰ বাবে কোনো ব্যৱস্থা গ্রহণ নকৰা ।
১২। লেফটেনেণ্ট ছিংগাৰ কোন আছিল?
উত্তৰ: লেফটেনেণ্ট ছিংগাৰ আছিল নগাঁৱৰ সহকাৰী উপায়ুক্ত ।
১৩। ফুলগুৰি ধাৱা কেতিয়া সংঘটিত হৈছিল?
উত্তৰ: ফুলগুৰি ধাৱা ১৮৬১ চনৰ অক্টোবৰ মাহত সংঘটিত হৈছিল ।
১৪। ৰঙিয়াৰ কৃষক বিদ্ৰোহ কেতিয়া সংঘটিত হৈছিল?
উত্তৰ: ৰঙিয়াৰ কৃষক বিদ্ৰোহ ১৮৯৩ চনৰ ২৪ ডিচেম্বৰৰ দিনা আৰম্ভ হৈছিল ।
১৫। লচিমা ক'ত অৱস্থিত?
উত্তৰ: লচিমা নামনি অসমৰ বৰপেটা মহকুমাৰ (বৰ্তমানৰ বজালী অঞ্চল) সৰুক্ষেত্ৰী মৌজাত অৱস্থিত ।
১৬। লচিমাৰ কৃষক বিদ্ৰোহ কেতিয়া সংঘটিত হৈছিল?
উত্তৰ: লচিমাৰ কৃষক বিদ্ৰোহ ১৮৯৪ চনৰ জানুৱাৰী মাহত সংঘটিত হৈছিল ।
১৭। পথরঘাটৰ কৃষক বিদ্ৰোহ কেতিয়া হৈছিল?
উত্তৰ: পথৰুঘাটৰ কৃষক বিদ্ৰোহ ১৮৯৪ চনৰ জানুৱাৰী মাহৰ ২৮ তাৰিখে হৈছিল ।
১৮। ১৮৬১ চনত জয়ন্তীয়া বিদ্ৰোহৰ নেতৃত্ব কোনে দিছিল?
উত্তৰ: উকিয়াং নবাৰ নেতৃত্বত ১৮৬১ চনত জয়ন্তীয়া বিদ্ৰোহ হৈছিল ।
১৯। ১৮৮১ চনত উত্তৰ কাছাৰৰ জনজাতীয় বিদ্ৰোহৰ নেতৃত্ব কোনে দিছিল?
উত্তৰ: ১৮৮১ চনত উত্তৰ কাছাৰৰ বিদ্ৰোহৰ নেতৃত্ব শম্ভুধন ফংলোছাই দিছিল ।
২০। টিকেন্দ্ৰজিতক কোনে মৃত্যুদণ্ডৰে দণ্ডিত কৰিছিল?
উত্তৰ: ব্ৰিটিছ চৰকাৰে (মণিপুৰলৈ পঠোৱা শক্তিশালী সৈন্য বাহিনীৰ বিচাৰত) টিকেন্দ্ৰজিতক মৃত্যুদণ্ডৰে দণ্ডিত কৰিছিল ।
২১। জে ডব্লিউ কুইণ্টনক কোন চনত হত্যা কৰিছিল?
উত্তৰ: জে ডব্লিউ কুইণ্টনক ১৮৯১ চনত হত্যা কৰিছিল ।
দীঘল উত্তৰৰ প্ৰশ্ন :
১। ১৮৫৭-৫৮ চনৰ বিদ্ৰোহৰ কাৰণ সম্পর্কে চমুকৈ আলোচনা কৰা।
উত্তৰ: অসমত ১৮৫৭ চনৰ বিদ্ৰোহৰ প্রধান কাৰণসমূহ আছিল—
অৰ্থনৈতিক শোষণ: ব্ৰিটিছৰ নতুন ৰাজহ নীতি আৰু মুদ্ৰা অর্থনীতিয়ে অসমীয়া কৃষ্যক জুৰুলা কৰিছিল 。
অভিজাত শ্ৰেণীৰ অসন্তুষ্টি: আহোম শাসনৰ ডা-ডাঙৰীয়াসকলে ব্ৰিটিছৰ দিনত তেওঁলোকৰ পুৰণি পদবী আৰু সা-সুবিধা হেৰুৱাইছিল ।
দাস প্ৰথাৰ বিলুপ্তি: ১৮৪৩ চনত ব্ৰিটিছে দাস প্ৰথা বিলুপ্ত কৰাত অভিজাত শ্ৰেণীটোৱে কায়িক শ্ৰম কৰিবলগীয়া হোৱাত অপমানিত অনুভৱ কৰিছিল ।
লাখেৰাজ ভূমিৰ ওপৰত কৰ: ব্ৰিটিছে ধৰ্মীয় অনুষ্ঠানৰ নিষ্কৰ ভূমিৰ ওপৰত কৰ বহুওৱাত ব্ৰাহ্মণ-পুৰোহিতসকল অসন্তুষ্ট হৈছিল 。
বংগৰপৰা লোক আমদানি: প্ৰশাসনত থলুৱা লোকৰ পৰিৱৰ্তে বংগৰপৰা লোক অনা কাৰ্যই শিক্ষিত অসমীয়াক ক্ষুব্ধ কৰিছিল 。
২। অসমত ১৮৫৭-৫৮ চনৰ বিদ্ৰোহত মণিৰাম দেৱানৰ ভূমিকা সম্পৰ্কে আলোচনা কৰা।
উত্তৰ: মণিৰাম দেৱান আছিল অসমত ১৮৫৭ চনৰ বিদ্ৰোহৰ মূল পৰিকল্পনাকাৰী । তেওঁ প্ৰথমতে ইংৰাজৰ বিশ্বাসী আছিল যদিও পিছলৈ তেওঁৰ চাহ বাগিচাৰ ওপৰত কৰ ৰেহাই নিদিয়া আৰু সা-সুবিধা কৰ্তন কৰাত তেওঁ বিদ্ৰোহী হৈ পৰে । ১৮৫৭ চনত তেওঁ কলিকতাত থাকোঁতে উত্তৰ ভাৰতৰ চিপাহী বিদ্ৰোহৰ খবৰ পায় আৰু অসমৰপৰা ইংৰাজক খেদি কন্দপেশ্বৰ সিংহক সিংহাসনত বহুৱাবলৈ ষড়যন্ত্র ৰচনা কৰে । তেওঁ কলিকতাৰপৰা পিয়লি বৰুৱা, কন্দপেশ্বৰ সিংহ আদিলৈ গোপন পত্ৰ পঠিয়াই বিদ্ৰোহৰ নিৰ্দেশ দিছিল । কিন্তু এই পত্ৰসমূহ হলৰইডে ধৰা পেলোৱাত তেওঁক কলিকতাত গ্ৰেপ্তাৰ কৰি যোৰহাটলৈ অনা হয় আৰু ১৮৫৮ চনৰ ২৬ ফেব্ৰুৱাৰীত ফাঁচী দিয়া হয় ।
৩। কি কি কাৰণত অসমত ১৮৫৭-৫৮ চনৰ বিদ্ৰোহ ব্যৰ্থ হৈছিল আলোচনা কৰা।
উত্তৰ: অসমত বিদ্ৰোহ ব্যৰ্থ হোৱাৰ মূল কাৰণসমূহ হ’ল:
সংখ্যাৰ অভাৱ: বিদ্ৰোহীসকলৰ সংখ্যা খুবেই কম আছিল আৰু ই কেৱল যোৰহাট-শিৱসাগৰতে সীমাবদ্ধ আছিল ।
নেতৃত্বৰ দূৰত্ব: মূল নেতা মণিৰাম দেৱান কলিকতাত আছিল, যাৰ বাবে সময়মতে যোগাযোগ সম্ভৱ হোৱা নাছিল ।
গোপনীয়তা ৰক্ষাত ব্যৰ্থতা: বিদ্ৰোহীসকলৰ গোপন পত্ৰসমূহ ব্ৰিটিছৰ হাতত পৰি গৈছিল ।
মধ্যবিত্তৰ বিমুখতা: নতুনকৈ গঢ়ি উঠা শিক্ষিত মধ্যবিত্ত শ্ৰেণীটোৱে এই বিদ্ৰোহত অংশ লোৱা নাছিল ।
অস্ত্ৰৰ অভাৱ: বিদ্ৰোহীসকলৰ হাতত উন্নতমানৰ অস্ত্ৰ-শস্ত্ৰ নাছিল ।
৪। অসমত ১৮৫৭ চনৰ বিদ্ৰোহৰ গুৰুত্ব সম্পৰ্কে আলোচনা কৰা।
উত্তৰ: ১৮৫৭ চনৰ বিদ্ৰোহৰ গুৰুত্বসমূহ হ’ল:
সৰ্বভাৰতীয় যোগসূত্ৰ: অসমৰ ইতিহাসত প্ৰথমবাৰৰ বাবে এক সৰ্বভাৰতীয় ঐতিহাসিক ঘটনাৰ লগত অসম জড়িত হৈছিল ।
কৃষক বিদ্ৰোহৰ অনুপ্ৰেৰণা: পৰৱৰ্তী সময়ৰ কৃষক বিদ্ৰোহসমূহ এই বিদ্ৰোহৰ দ্বাৰাই অনুপ্ৰাণিত হৈছিল ।
সাম্প্রদায়িক ঐক্য: হিন্দু আৰু মুছলমান উভয় সম্প্ৰদায়ে একগোট হৈ বিদ্ৰোহত অংশ লৈ জাতীয়তাবোধ জগাই তুলিছিল ।
স্বাধীনতা আন্দোলনৰ ভিত্তি: মণিৰাম দেৱান আৰু তেওঁৰ সহযোগীসকলৰ ত্যাগে ভৱিষ্যতৰ স্বাধীনতা সংগ্ৰামীসকলক দেশপ্ৰেমৰ শিক্ষা দিছিল ।
৫। ফুলগুৰি ধাৱাৰ ওপৰত এটি টোকা লিখা।
উত্তৰ: ১৮৬১ চনত নগাঁৱৰ ওচৰৰ ফুলগুৰিত হোৱা বিদ্ৰোহেই হ’ল অসমৰ প্ৰথম কৃষক বিদ্ৰোহ । চৰকাৰে আফু খেতি কৰা নিষিদ্ধ কৰাত আৰু তামোল-পাণৰ ওপৰত কৰ লগাব বুলি ওলোৱা বাতৰিৰ বাবে তিৱা কৃষসকল অতিশয় ক্ষুব্ধ হৈছিল । প্ৰতিবাদ কৰিবলৈ গোট খোৱা হাজাৰ হাজাৰ কৃষকক সহকাৰী উপায়ুক্ত লেফটেনেণ্ট ছিংগাৰে অপমান কৰাত উত্তেজিত ৰাইজে ১৮ অক্টোবৰত তেওঁক লাঠিৰে কোবাই হত্যা কৰে I ইয়াৰ পাছত ব্ৰিটিছে কঠোৰ হাতেৰে বিদ্ৰোহ দমন কৰে আৰু লক্ষ্মণ ডেকা, চংবৰ লালুং আদি কেইবাজনক মৃত্যুদণ্ড বিহে । এই ঘটনাই অসমীয়া কৃষকক সাংগঠনিকভাৱে যুঁজিবলৈ অনুপ্ৰেৰণা দিছিল I
৬। ১৮৯৪ চনত উত্তৰ কামৰূপত সংঘটিত হোৱা কৃষক বিদ্ৰোহ সম্পর্কে আলোচনা কৰা।
উত্তৰ: ১৮৯৩-৯৪ চনত নামনি অসমৰ ৰঙিয়া আৰু লচিমাত তীব্ৰ কৃষক বিদ্ৰোহ হৈছিল।
ৰঙিয়া বিদ্ৰোহ: ১৮৯৩ চনৰ ডিচেম্বৰত বৰ্ধিত খাজনাৰ বিৰুদ্ধে ৰঙিয়াৰ কৃষকে বজাৰ লুট কৰি বিদ্ৰোহ আৰম্ভ কৰে 。 ১০ জানুৱাৰীত উপায়ুক্ত মেক কেবে থানাৰ সন্মুখত সমবেত হোৱা ৩০০০ কৃষকৰ ওপৰত গুলীচালনাৰ নিৰ্দেশ দিয়ে, যাৰ ফলত কৃষকসকল পিছুৱাই যাবলৈ বাধ্য হয় 。
লচিমা বিদ্ৰোহ: ১৮৯৪ চনৰ জানুৱাৰীত লচিমাত খাজনা সংগ্ৰহ কৰিবলৈ যোৱা মৌজাদাৰ আৰু মণ্ডলক ৰাইজে আক্ৰমণ কৰে । উপায়ুক্তই ৫৯ জন কৃষকক গ্ৰেপ্তাৰ কৰি বন্দী কৰে। পিছলৈ ৬০০০ লোকে স্বাক্ষৰিত আবেদন দি তেওঁলোকৰ মুক্তি বিচাৰিছিল যদিও ব্ৰিটিছে শক্তি প্ৰয়োগ কৰি তেওঁলোকক দমন কৰে ।
৭। ১৮৯৪ চনত পথৰুঘাটত সংঘটিত হোৱা কৃষক বিদ্ৰোহৰ এটি খতিয়ান দাঙি ধৰা।
উত্তৰ: ১৮৯৪ চনৰ জানুৱাৰী মাহত দৰঙৰ পথৰুঘাটত এক ভয়ংকৰ কৃষক বিদ্ৰোহ হৈছিল । বৰ্ধিত খাজনাৰ প্ৰতিবাদত জানুৱাৰী মাহৰ ২৬ ৰপৰা ২৮ তাৰিখলৈ এখন বৃহৎ ৰাইজমেল অনুষ্ঠিত হৈছিল । জিলাধিপতি এণ্ডাৰছন আৰু আৰক্ষী অধীক্ষক বেৰিংটনে এই সমাৱেশ বন্ধ কৰিবলৈ আহি কৃষকসকলক সম্পত্তি বাজেয়াপ্ত কৰাৰ ভাবুকি দিছিল । উত্তেজিত ২০০০ কৃষকে লাঠি আৰু বাঁহ লৈ তেওঁলোকক আগুৰি ধৰাত উপায়ুক্তই গুলীচালনাৰ নিৰ্দেশ দিয়ে । চৰকাৰী হিচাপ মতে ১৫ জন আৰু বেচৰকাৰী হিচাপ মতে ১৪০ জন কৃষক এই গুলীচালনাত নিহত হৈছিল । ইয়াক ‘পথৰুঘাটৰ ৰণ’ বুলিও জনা যায়।
৮। ১৮৫০ চনত ব্ৰিটিছৰ বিৰুদ্ধে জয়ন্তীয়াসকলে কৰা বিদ্ৰোহৰ বিষয়ে এটি টোকা লিখা।
উত্তৰ: জয়ন্তীয়া পাহাৰ ১৮৩৫ চনত ইংৰাজৰ অধীনলৈ যায় । ইংৰাজে তেওঁলোকৰ ধৰ্মীয় অনুষ্ঠান আৰু সামাজিক জীৱনত হস্তক্ষেপ কৰাৰ লগতে ঘৰ কৰ আৰু আয়কৰ বহুওৱাত জয়ন্তীয়াসকল বিদ্ৰোহী হৈ পৰে । ১৮৬১ চনত উকিয়াং নবাৰ নেতৃত্বত তেওঁলোকে সজোৰে বিদ্ৰোহ আৰম্ভ কৰে আৰু জোৱাইত থকা ব্ৰিটিছ ছাউনীত আক্ৰমণ কৰে । ব্ৰিটিছে অতি নিষ্ঠুৰভাৱে বিদ্ৰোহ দমন কৰিবলৈ সামৰিক বাহিনী নিয়োগ কৰে। অৱশেষত উকিয়াং নবা ধৰা পৰে আৰু ১৮৬৩ চনত তেওঁক ফাঁচী দিয়া হয়, যাৰ ফলত বিদ্ৰোহৰ অন্ত পৰে 。
৯। ১৮৯১ চনত মণিপুৰত টিকেন্দ্ৰজিতৰ নেতৃত্বত ব্ৰিটিছৰ বিৰুদ্ধে হোৱা বিদ্ৰোহৰ বিষয়ে লিখা।
উত্তৰ: মণিপুৰত সিংহাসন লাভৰ বাবে হোৱা গৃহ কন্দলত ব্ৰিটিছে অনাহকতে হস্তক্ষেপ কৰিছিল । ব্ৰিটিছে দেশপ্ৰেমিক সেনাপতি টিকেন্দ্ৰজিতক দেশান্তৰিত কৰিবলৈ ৰজা কুলচন্দ্ৰক হেঁচা দিয়ে । যেতিয়া কমিছনাৰ কুইণ্টন আৰু চাৰিজন বিষয়াই টিকেন্দ্ৰজিতক ধৰিবলৈ যায়, তেতিয়া মণিপুৰীসকলে আটাইকেইজনকে হত্যা কৰে । ইয়াৰ প্ৰতিশোধ ল'বলৈ ব্ৰিটিছে সৈন্য পঠিয়াই টিকেন্দ্ৰজিতক গ্ৰেপ্তাৰ কৰে আৰু ফাঁচী দিয়ে । ৰজা কুলচন্দ্ৰক নিৰ্বাসন দি এজন নাবালক চুড়চন্দ্ৰক ৰজা পাতি মণিপুৰত ব্ৰিটিছৰ আধিপত্য স্থাপন কৰা হয় ।
চমু টোকা লিখা :
১। অসমত ইংৰাজে প্রবর্তন কৰা ৰাজহ ব্যৱস্থা
উত্তৰ:ইংৰাজে অসমত পূৰ্বৰ পাইক প্ৰথাৰ সলনি মুদ্ৰা অর্থনীতি আৰু নতুন ভূমি ৰাজহ ব্যৱস্থা প্ৰৱৰ্তন কৰিছিল । এই ব্যৱস্থাত কৃষকে উৎপাদিত বস্তুৰ সলনি নগদ ধনৰ মাধ্যমত খাজনা দিবলগীয়া হৈছিল I ব্ৰিটিছে জিলা অনুযায়ী খাজনাৰ পৰিমাণ তীব্ৰভাৱে বৃদ্ধি কৰিছিল। উদাহৰণস্বৰূপে ১৮৩২ চনত ১.৮৩ লাখ টকাৰ ৰাজহ ১৮৫২ চনত ৭.৪৩ লাখলৈ বৃদ্ধি পাইছিল । এই ব্যৱস্থাই গাঁৱৰ আত্মনিৰ্ভৰশীল অৰ্থনীতি ধ্বংস কৰি সুদখোৰ মহাজন শ্ৰেণীৰ সৃষ্টি কৰিছিল ।
২। মণিৰাম দেৱান
উত্তৰ:মণিৰাম দেৱান (মণিৰাম বৰভাণ্ডাৰ বৰুৱা) আছিল এজন অতি বিচক্ষণ ব্যক্তি যি এসময়ত ব্ৰিটিছৰ অধীনত চিৰস্তাদাৰ আৰু পিছত অসম টি কোম্পানীত দেৱান হিচাপে কাম কৰিছিল । তেওঁ ১৮৫৭ চনৰ বিদ্ৰোহৰ সময়ত অসমত ব্ৰিটিছৰ বিৰুদ্ধে ষড়যন্ত্ৰৰ মূল নায়ক আছিল । তেওঁৰ লক্ষ্য আছিল ব্ৰিটিছক খেদি আহোম শাসন পুনৰ প্ৰতিষ্ঠা কৰা। কিন্তু তেওঁৰ চিঠি ধৰা পৰাত তেওঁক গ্ৰেপ্তাৰ কৰা হয় আৰু ১৮৫৮ চনৰ ২৬ ফেব্ৰুৱাৰীত যোৰহাটত ফাঁচী দিয়া হয় 。
৩। ফুলগুৰি ধাৱা
উত্তৰ:১৮৬১ চনত নগাঁৱৰ ফুলগুৰিত হোৱা বিদ্ৰোহক ‘ফুলগুৰি ধাৱা’ বোলা হয়। ব্ৰিটিছে আফু খেতি নিষিদ্ধ কৰা আৰু তামোল-পাণৰ ওপৰত কৰ বহুওৱাৰ আশংকাত তিৱা আৰু লালুং কৃষসকল একগোট হৈছিল । বিদ্ৰোহীসকলে ১৮ অক্টোবৰত সহকাৰী উপায়ুক্ত লেফটেনেণ্ট ছিংগাৰক হত্যা কৰি মৃতদেহ কলং নৈত পেলাই দিছিল I ই আছিল অসমৰ প্ৰথমটো গণভিত্তি থকা কৃষক বিদ্ৰোহ যিয়ে ব্ৰিটিছৰ শোষণৰ বিৰুদ্ধে সাধাৰণ ৰাইজক সজাগ কৰিছিল I
৪। লচিমাৰ কৃষক বিদ্ৰোহ
উত্তৰ:১৮৯৪ চনৰ জানুৱাৰী মাহত বৰপেটা মহকুমাৰ সৰুক্ষেত্ৰী মৌজাত এই বিদ্ৰোহ হৈছিল। বৰ্ধিত খাজনা সংগ্ৰহ কৰিবলৈ যোৱা মৌজাদাৰ দাসোৰাম চৌধুৰী আৰু মণ্ডল হলিৰাম মিশ্ৰক কৃষকে মাৰপিট কৰিছিল । ইয়াৰ পাছত ব্ৰিটিছে ৫৯ জন লোকক গ্ৰেপ্তাৰ কৰি অস্থায়ী জেলত ভৰাই থয়। হাজাৰ হাজাৰ কৃষকে তেওঁলোকৰ মুক্তিৰ বাবে স্বাক্ষৰিত আবেদন দিছিল যদিও ব্ৰিটিছে কৃষকসকলক লাঞ্ছিত কৰি বিদ্ৰোহ দমন কৰিছিল I
৫। পথৰুঘাটৰ ৰণ
উত্তৰ:১৮৯৪ চনৰ ২৮ জানুৱাৰীত দৰঙৰ পথৰুঘাটত হোৱা তীব্ৰ কৃষক বিদ্ৰোহক ‘পথৰুঘাটৰ ৰণ’ বোলা হয় । ৰাইজমেলৰ যোগেদি খাজনা বৃদ্ধিৰ প্ৰতিবাদ কৰা প্ৰায় ২০০০ কৃষকৰ ওপৰত উপায়ুক্ত এণ্ডাৰছনৰ নিৰ্দেশত ব্ৰিটিছ সেনাই নিৰ্বিচাৰে গুলীচালনা কৰে 。 ইয়াত ১৪০ জনকৈ কৃষক নিহত হোৱাৰ কথা জনা যায়। ই আছিল ব্ৰিটিছৰ নৃশংসতাৰ এক চৰম নিদৰ্শন আৰু অসমৰ স্বাধীনতা সংগ্ৰামৰ এক উল্লেখযোগ্য ঘটনা 。
৬। অসমত কৃষক বিদ্ৰোহৰ গুৰুত্ব
উত্তৰ:উনবিংশ শতিকাত সংঘটিত কৃষক বিদ্ৰোহসমূহ যদিও ব্ৰিটিছে দমন কৰিবলৈ সক্ষম হৈছিল, তথাপিও ইয়াৰ গুৰুত্ব অপৰিসীম 。 এই বিদ্ৰোহসমূহে সাধাৰণ শ্ৰমিক আৰু কৃষসকলক ৰাজনৈতিকভাৱে সচেতন কৰি তুলিছিল I ‘ৰাইজমেল’ৰ জৰিয়তে গণতান্ত্ৰিক উপায়েৰে যুঁজাৰ শিক্ষা ৰাইজে পাইছিল । এই বিদ্ৰোহসমূহে পৰৱৰ্তী সময়ত ভাৰতৰ স্বাধীনতা আন্দোলনত অসমীয়া জনগণক একগোট হৈ যুঁজিবলৈ অনুপ্ৰেৰণা যোগাইছিল I
৭। টিকেন্দ্ৰজিৎ
উত্তৰ:বীৰ টিকেন্দ্ৰজিৎ আছিল মণিপুৰৰ সেনাপতি যিয়ে দেশৰ স্বাধীনতা ৰক্ষাৰ বাবে ব্ৰিটিছৰ বিৰুদ্ধে তীব্ৰ সংগ্ৰাম কৰিছিল । ১৮৯১ চনত ব্ৰিটিছ বিষয়া কুইণ্টন আৰু আন চাৰিজন বিষয়াক হত্যা কৰাৰ অভিযোগত তেওঁক মূল নায়ক হিচাপে অভিযুক্ত কৰা হয় । এজন অত্যন্ত জনপ্রিয় নেতা হিচাপে তেওঁ মণিপুৰীসকলৰ মাজত শ্ৰদ্ধাৰ পাত্ৰ আছিল। অৱশেষত ব্ৰিটিছে তেওঁক গ্ৰেপ্তাৰ কৰে আৰু দেশদ্ৰোহৰ অপৰাধত ফাঁচী দিয়ে I তেওঁক মণিপুৰৰ এজন মহান দেশপ্ৰেমিক হিচাপে গণ্য কৰা হয়।